شجرة الصنوبر

السلام عليكم ورحمة الله وبركاته
ازيكم كلكم كده ع بعضكم
اليومين اللي فاتوا انا للأسف مكنتش فاضي اكتب وكمان كنت مخنوق عشان حاجات كتير حصلت لي
خلينا احسن ف صورة انهارده
الصورة دي من أول ورشة عمل الصيف ده قمت بيها مع صديقي علي سعيد في زيارة لمكان جديد عليا
حدائق انطونيادس
انا اول مرة اروحها بصراحة وكنت فاكرها هي اللي ورا جنينة الحيوان علطول اتاري دي النزهة وانطونيادس لها بوابة تانية وتذكرة تانية ومحدش يسأل ليه الجناين ف مصر لها تذاكر اصلا
المهم دخلت الجنينة وانبهرت بالمنظر
فعلا حدائق روعة جدااا
هي كذا حديقة جنب بعض وفيهم شجر كتييير مش موجود ف اي مكان في مصر زي شجرة الصنوبر اللي شايفينها ف الصورة واللي عليها دول غربان جمع غراب يعني
انا كنت اول مرة برضه اشوف شجرة صنوبر ع الحقيقة واشوف الثمرة بتاعتها وما شاء الله الشجرة طويلة جدا ومثمرة ومفرعة
الجو هناك رائع جدا ويفتح النفس والحديقة فعلا معتني بيها كويس جدا
فيه بس حاجتين ضايقوني جدا وهم اللي مبوظين شكل الجنينة
انها جنينة للحبيبة والهبل اللي بيحصل فيها ده اولا
وثانيا ان التماثيل هناك مش معتني بيها خالص متوسخة ومتكسرة بس مش كلها
بس بشكل عام الجنينة عاوزة عناية اكتر من كده شوية عشان فيه مساحات مش مستغلة
طبعا بدعوكم تروحوا تتفرجوا ع الجنينة هناك وتقضوا يوم رائع
وان شاء الله تعجبكم وان شاء الله اجيب لكم ف مرات قادمة صور تانية منها
بس كده