ستانلي...كوبري وذكريات

السلام عليكم ورحمة الله وبركاته
ازيكم كمان مرة يا بني آدمين
عاملين ايه من غيري
عارف عارف طبعا مش عاملين حاجة
طيب المهم
انهارده معايا صورة لجزء من كوبري ستانلي وقت الغروب
بس انا مش هتكلم عن الصورة قد ما هتكلم عن الكوبري
اللي بييجي اسكندرية دايما بييجي وبيحب يتصور فوق الكوبري ده...الكوبري تم تصميمه ع طراز قصور المنتزه فوق خليج ستانلي
عدي ف اي وقت ف الصيف هتلاقي ناس بتتصور وناس بتصطاد وناس بتتمشي وكمان لامؤاخذة حبيبة قاعدين سوا غير العرايس والعرسان اللي رايحين جايين فوق الكوبري والكاميرا وراهم
شوفتوا اد ايه بشر لها ذكريات مع الكوبري ده
يمكن عشان هو الكوبري الوحيد ف اسكندرية اللي فوق البحر...بس ده لا يمنع انه مميز جدا
خصوصا بالليل لما الاضاءات بتاعت الكوبري تنوره...مزيج جميل من البنفسجي والابيض والاخضر مع انعكاسات ع المياه تحسسك بعالم تاني وجو فظيع لو سرحت مع نفسك ف الامواج وف هوا البحر المنعش
ويا سلام انت بقي لو قاعد فوق الكوبري الخشب اللي ع شط ستانلي
انسي هتبقي ف عالم تاني فعلا
انا عارف انه عاوز شوية اهتمام ويبقي احسن وياريت فعلا يهتم باضاءاته ويتم دهانه مرة تانية عشان يظهر بصورة افضل
واسيبكم مع الصورة