الله أكبر...الله أكبر

السلام عليكم ورحمة الله وبركاته
انا مش قادر اوصف لكم السعادة اللي انا فيها من وقت ما كتبت اخر موضوع هنا في المدونة
انا بشكر جداااااااااا كل الناس اللي بتشجعني سواء بالكتابة هنا في المدونة أو لما بيشوفوني وبيقولوا لي
انا دلوقتي في حالة غير اللي كنت فيها المرة اللي فاتت ابسلوتلي ع رأي عمو اللمبي
واللي زود الفرحة دي اني يوم الجمعة الماضية اللي هي 13 مارس وصل لي ايميل من احد المواقع اللي بتعمل مسابقات شهرية للتصوير الفوتوغرافي عن طريق التصويت وبدون جوايز اني فزت بالمركز الاول عن ثيمة الشروق والغروب بالصورة اللي كانت ف الموضوع ده
http://elmsawaraty.blogspot.com/2009/01/blog-post_06.html

وبعتوا لي شهادة بكده
,هنا الصورة بتاعتي ع الموقع
http://www.currentphotocontest.com/WINNERS/photoofthemonth/photoofthemonthfeb/0907.aspx

طبعا انا اترفعت معنوياتي عشان حسيت ان صورة من صوري طلعت كويسة فعلا واني مش بضحك ع نفسي ولا حاجة
نيجي بقي لصورة انهارده كفاية رغي....رغاي قوي انا
صورة انهارده يشوفها الناس كتير في القاهرة مدينة الالف مئذنة خصوصا في منطقة القلعة والقاهرة الاسلامية القديمة
الصورة لمآذن القاهرة من فوق قلعة صلاح الدين الايوبي جنب جامع محمد علي وتحديدا مآذن مسجد الرفاعي اللي مدفون فيه الملك فاروق
القاهرة القديمة بجد روووعة جدا ولو واحد بيحب يصور الاماكن القديمة زيي مش هيسيب الاماكن دي ابدا
فيه مناطق كتييييييير زي الخليفة - السيدة زينب - السيدة عائشة - القلعة - الدرب الاحمر - الجمالية و.......الخ
وكلهم جنب بعض تقريبا وفيهم آثار قديمة من العصر الاسلامي في مصر
بس كده مش هطول عليكم المرة دي
يارب الصورة تعجبكم واشوفكم ع خير الاسبوع القادم مع مفاجآة ان شاء الله