نسم علينا الهوا

السلام عليكم ورحمة الله وبركاته
ازيكم يا جدعان ويا بني ادمين ويا كل الناس اللي بتدخل المدونة اللذيذة الكميلة الكوتي كوتي بتاعتي
كفاية فشخرة بقي
الصيف جه والامتحانات جايه وكله خير ان شاء الله
كلها كام يوم ونخلص الامتحانات....زي شكت الدبوس...ف الاخر هتعدي وان شاء الله تعدي ع خير بدون اي اصابات
وبالمناسبة السعيدة دي انا جبت لكم انهارده صورة من باجووووووووووش
باجوش يا حبي..ايهي اها
يا حتة من قلبي...ايهي اها
النشيد الوطني الباجوشي
والناس اللي متعرفش باجوش اقولهم انا
ده شاطئ قبل مرسي مطروح ب 40 كيلو تقريبا...فيه ارض تابعة لجامعة الاسكندرية بيتعمل فيها معسكر جاااااااااااامد جدا وممتع جدا كل سنة لكل اللي ف الجامعة سواء طلبة أو دكاترة أو عاملين
البحر والجو وكل حاجة هناك جميلة جدا جدا جدا...الكل بيستمتع وخصوصا لو طالعين جروب اصدقاء سوا
الصورة بتاعت انهارده من السنة اللي فاتت علي التبة اللي جنب الشط
المفروض كانت تبقي احسن لو كنت عامل فوكس ع الشمسية مش الصخر بس للأسف مكنتش اتعلمت تصوير ساعتها فمكنتش اعرف الفنيات ولا الفوكس ولا الحاجات دي
ان شاء الله لو اتيحت ليا الفرصة هصورة صورة زيها مرة تانية السنة دي
واتمني للكل صيف لذيذ
وبرضه متنسوش تدعوا لي ف الامتحانات
سلامي

مدينة الالف مئذنة

السلام عليكم ورحمة الله وبركاته
ازيكم يا بني ادمين
ايون بني ادمين
ما انا عرفت ان فيه كائنات تعيش وتتعايش من الجنس البشري بتشوف المدونة
احمدك يا رب واشكر فضلك
واخدي لي بالك يابو صلاح
متشكرين والله يا كبيير
ومتشكرين جدا يا بهاء...يا جدعان افتكروا الاسم ده تحديدا عشان الراجل ده هيظبطني بعد كده ان شاء الله
===============
نرجع لصورة انهارده
ودي للمسجد الازهر ليلا في قاهرة المعز
الصورة زي مانتو شايفيين للمآذن الامامية وجزء من الباب فقط
الاضاءات ما شاء الله قوية جدا ومبهرة
انا مصورها من ناصية الشارع ع الجهة المقابلة
ولمعلوماتكم الشارع ده اسمه ش الازهر واخره صلاح سالم
ع الجانب التاني من الطريق منطقة الحسين وان شاء الله ابقي ف مرة قادمة اعرض لكم صورة مئذنة مسجد الحسين رضي الله عنه
المنطقة بالليل روعة جداااا....فيها حاجة تشدك لزمان وليالي زمان واصالة زمان
انا بقي نفسي اشوف المنطقة دي ف رمضان وتحديدا في صلاة القيام بتبقي عاملة ازاي
اكييييييييييد حاجة تانية خالص
يارب اوعدنا
اللي عاوز يشوف مدينة الالف مئذنة يروح يقف في اي منطقة عالية حوالين الازهر وهو هيشوف كمية مآذن بسم الله ما شاء الله وكمان كلها ع الطراز القديم وتحس بجد بالقاهرة القديمة وانت بتشوفها
اشوفكم ع خير ان شاء الله
وادعولي يا بني ادمين عندنا امتحانات يارب تعدي ع خير

البيت القديم

السلام عليكم ورحمة الله وبركاته
ازيكم يا اشباح
بما ان يعني محدش بييجي المدونة والعنكبوت هيعشش قريب
بس ما علينا انا هفضل اكتب ف المدونة دي عشانك
.
..
...
عشانك يا مصر
اوعي حد يضحك
ده انا بضحي عشان مصر..اومال ايه
يعني هي مصر تطول
ما الفراعنة كانوا مقضيينها رسم ع الحيطة زي العيال الخايبة
لا ومش مكفيهم شخبطة ورسم كمان بيحفروا ع الحيطة
والناس عجبها شغل الفراعنة اللي لو جابوا مبيض محارة كان عمل شغل ع ميه بيضه احسن منه
ابقي انا اقل منهم ف ايه بقي
انا ع الاقل بصور ومش بوسخ الحيطة وشغلي نضيف وجرب وشوف براحتك يا بيه
واسأل بره...وانت هتبقي زبوني
كفاية هبل بقي وقول البوقين بتوع الصورة بتاعت انهارده عشان متصدعناش
بصراحة مفيش كلام اقوله..فقلت اقول اي حاجة تيجي ع بالي
دي صورة من صور الفيوم....الرحلة اياها
بيت من ايام الاحتلال كان لظابط انجليزي ودلوقتي خرابة تقريبا
يقال انه هيتظبط وكده بس حلني بقي
الا يعني ايه حلني دي
انا كنت مصور الصورة بالالوان عادي وقلبتها ابيض واسود عشان تدي الايحاء بالبعد التاريخي للفترة الزمنية الفارقة بين الوقت الحاضر والعصر المضمحل وتعكس الشعور الداخلي بتأثير الزمن علي تعاقب الاجيال
الله عليك يا نجم يا مكسر الدنيا
بس كده
حد عاوز حاجة مني قبل ما امشي
ايس كريم...كلو كلو

التنورة كمان وكمان

السلام عليكم ورحمة الله وبركاته
خلال الدروة الهندسية اللي كانت ف حلوان
انا طبعا كنت فاضي وقت كبييييييييييير
فقلت اروح احضر حفل التنورة اللي ف الغورية
وطبعا المرة دي كنت مجهز نفسي تمام...اخدت معايا الحامل بس للأسف وصلت قبل الحفلة ب تلت ساعة بس
فمكانش فيه مكان نوهائي
المهم ظبت يوميها كام صورة حلوين ومختلفين عن اول مرة
عجبتني الصورة دي منهم فقلت اعرضها عليكم
طبعا العرض كالعادة خراااااااافي وروعة جدااا
سواء كان المنشد او الراقصين او العازفين او حتي الاداء بتاع الراقصين اثناء الانشاد
فعلا معبر زي الصورة دي
المكان كان مزدحم جدااا بالاجانب وانا كنت مبسوط بحاجة زي كده وخصوصا لما زرت الحسين وشفت اجانب اكتر من المرة اللي فات ولا كأن كان فيه عمل ارهابي ولا حاجة
ربنا يجعل مصر آمنة دايما
اسيبكم مع الصورة
واستنوا صور كتيييييييييير المرات القادمة ان شاء الله

مبرووووووووووك ليا

السلام عليكم ورحمة الله وبركاته
اعتذر اني مكتبتش الاسبوع اللي فات
بس ولا يهمكم
الاسبوع اللي فات كان اسبوع الجوايز بالنسبة لي
اولا فزت بالمركز التاني ع مستوي كليات الهندسة ف الجمهورية ف الدورة اللي اقامتها جامعة حلوان
طبعا حد هيسألني ليه مأخدتش المركز الاول
هقوله لسببين: اولا اللي كان بيحكم كان دكتور رسم مش تصوير يعني مش هيفهم ف فنيات التصوير
ثانيا احنا كنا اخدنا اول رسم فبطبيعة الحال ف مصر مش هيرضوا يدونا مرتين اول وهيدوا اول لحلوان
عادي يعني
نعديها دي
لكن هم مكانوش عاوزين يعدوها....ع رأي المثل رضينا بالهم والهم ما رضا بينا
قال ايه معملوش كأس للمراكز الاولي للتصوير والرسم
واحنا هناك عملوا بطولة للبلاي ستيشن وكسبها واحد من الطلبة المنظمين فعملوا له كأس
حاجة تغيظ صحيح
ثانيا فزت بالمركز الثالث ع مستوي جامعة الاسكندرية
واخيرا وليس اخرا ان شاء الله
فزت بمسابقة الشهر ف الموقع اللي فزت فيه قبل كده
http://www.currentphotocontest.com/WINNERS/March2009/Architecture.aspx

بس كده
وعشان المناسبات السعيدة دي
اهديكم الوردة دي
واشوفكم ع خير ان شاء الله