Monkey Hands

السلام عليكم
مع صورة الاسبوع التالت ف شهر يناير
الصورة دي في جنينة الكلية وطبعا مش ف جنينة الحيوانات
عجبني قوي منظر الجزء ده من الشجرة وهي عاملة زي ايد قرد او شمبانزي محاوطين بعض
بجد شكلهم حلو قوي سبحان الله
جنينة الكلية مليانة حاجات حلوة كتييييييييير
بعد ما صورت شوية صور حسيت اني بصور في غابة استوائية
الورق عريض وكبير والشجر اخضر ولونه حلو جدا وفيه اشكال وتكوينات غريبة في الشجر والزرع عامة
سبحان الله
كفاية رغي ونشوف الفيلم....سوري الصورة

سابني وراح......

السلام عليكم
ورجعنا لكم مع برنامجكم المحبوب وناخد اول اتصال ونقول الو
وزي ما احمد حملي عمل انا برضه عملت واتكيت اتنر ف الكيبورد
مش عارف ايه اللي فكرني بفيلم ظرف طارق بس هي جت كده عشان انا بحب الفيلم ده جداااااااااااااااااااااااااااااااااااااااااااااااااا وشفته بتاع 52 مرة فقط ورا بعض
ما علينا دي مدونة صور مش مدونة سينمائية
اه انهارده معايا صورة حلوة وكان ليها الشرف ان رحاب حلمي ربنا يكرمها يارب عشان ساعدتني كتييييييير جدا ف الفوتوشوب لعبت بيها شوية ع الفوتوشوب وطلعت حاجات حلوة
الله ينور يا رحاب
بس كده
شوفوا الصورة وكفاية
يالا سلامي

رجل علي حافة العالم

السلام عليكم
ازيكم مرة تانية مع صورة الاسبوع
الصورة دي ضمن مجموعة صور أخدتها ف يوم بعد العصر كنت ف الكلية وقررت اطلع اصور الصيادين عند اللسان بتاع جليم
طبعا الصيادين كلهم ودودين جدااا وما شاء الله عليهم كلهم بيطلعوا حلوين جدا ف الصور عشان كده بقيت احب اصورهم كتير
واحسن حاجة انهم كمان مش بيهتموا او بيركزوا مع اللي بيصورهم
يعني كل واحد ف حاله عشان الصورة تطلع ع طبيعتها
نرجع بقي للصورة دي
بالاضافة الي انها من ضمن مجموعة افضل الصور اللي انا بعشقها وكمان هي من صور السولويت او السوليت او التصوير ف وش الشمس
ولمعلوماتكم ده مش معناها بالفرنساوي لكن ده اسم وزير فرنسي كان بيحب يعمل اشكال بالضوء زي كده فتم تسميتها باسمه
طبعا الصورة مش وقت غروب دي وقت العصر
الصورة بقي لواحد من الصيادين اللي بيصادوا هناك بالسنارات الطوييييييلة جدا
والراجل زي العسل عجبته الصورة قوي ومكنش مصدق انه اللي ف الصورة
وده من الناس القليلين اللي بياخدوا اولادهم معاهم وهم بيصطادوا عشان يساعدوهم
اتمني انها تعجبكوا ومكونش ازعجتكم بالرغي عشان هي لما بتفتح....
واستنوني مع الصورة القادمة ان شاء الله

القوقع....حبيب هارتي

ازيكم مرة كمان
انا قلت عشان اصالحكم لازم احط لكم صورتين المرة دي
وقلت احسن حاجة تبقي حاجة انا بحبها
وانا بحب جدا تصوير الماكرو..يعني العالم الصغير اللي حوالينا اللي احنا مش حاسين بيه ولا شايفينه
الصورة دي برضه كانت في يوم ورشة العمل بس واحنا مستنيين الاتوبيس عشان نروح بحري
الدنيا كانت لسه ممطرة والقواقع طلعت من مخابئها
وطلع شنباتك لمراتك
هههههههههههههههههههه
محدش يقولي عاوز ياكله عشان انا عارف فيه ناس بتحب الحاجات دي
وخصوصا وانه كوتي كوتي كميله ننوس عين امه
شوفوا بيبص ازاي بعينيه الحلوين
سبحان الله

الغروب من الماكس

ازيكم
طبعا عارف اني واحشكم والكلام ده
طبعا طبعا من غير ماتقولوا
كريم كان هيضربني عشان اتابع المدونة وانا مش بتاع مدونات اصلا
بس ما علينا انا قولت يا واد يا حمادة خليك طيب واسمع الكلام
وبحب اشكر كل الناس اللي شجعوني ع البداية دي
واحب اسمع ما تزوقيني يا ماما قوام يا ماما

ايه الرغي ده كله
نيجي للمهم يا مليجي
صورة انهارده ف مكان لو غبت وقت كبير اصور فيه مش هبطل تصوير ومش هقدر المه كله
المكان فعلا جميل جدا ومليان بالحركة والانفعالات والناس الحلوة
طبعا مش لازم اقول انه المكس عشان انتوا شفتوا العنوان
دي بقت كانت صورة في يوم ورشة العمل للتصوير الفوتوغرافي تبع الجامعة
ومستنيين المعرض ف التيرم التاني ان شاء الله
والكل مدعو طبعا مش عاوزة كلام دي