السلام عليكم ورحمة الله وبركاته
انا بصراحة مش عارف هبدأ ازاي علشان دي اول مرة هعمل مدونة بس خلاص انا بدأت والسلام
نبدأ الحكاية من سنتين الا شوية....شخص عادي ومازلت يعني محدش يفتكر حصل حاجة :) المهم قررت مرة واحدة بموافقة الحاج اللي هو أبويا اني اشتري كاميرا ديجيتال ومحدش يقولي هتعمل بيها ايه ولا هستفاد منها ايه لأني مكنتش اعرف
طبعا حاجة زي دي كانت عاوزة دراسة جدوي وحركات من دي عشان انت مش هتشتري واحدة كل يوم....عملت فحص وتمحيص وقلبت النت من فوقه لتحته عشان افهم موضوع الكاميرات الديجيتال...ربنا بعت لي دكتور اسنان من القاهرة ربنا يكرمه اسمه د عمرو قعد معايا كتيييييييير قوي ع المسنجر يفهمني كل حاجة ف الكاميرا طبعا مش هنكر انا كنت ف الاول بطيخة عشان مكنتش غير مهتم اني اجيب الكاميرا والتفاصيل بعد كده
بعد ما فهمت منه الانواع والذي منه رحت ادور بنفسي ع الكاميرات ع النت واعرضها عليه
خلصت امتحانات من هنا ونزلت اسكندرية اشوف التوكيلات واسأل عن الاسعار واتصدم...اسأل واتصدم لحد ما زهقت
د عمرو قالي حاول تشوف حد بره يجيبها لك معرفتش طبعا لأني كان قدامي شهر وعاوز اجيبها
هوبا ايه خالتي مسافرة عمرة....قشطة ياواد نشوف بقي التوكيلات هناك وبعد تمحيص برضه قالولي متشتريش من التوكيل اشتري من الموزع عشان بيبيع ارخص وكمان معاها هدية...ومحدش يحاول يسألني ازاي
من هنا لهنا الكاميرا جت الحمد لله يوم 11 يوليو 2007
يا حلاوة يا ولاد همسك كاميرا ديجيتال بتاعتي ف ايدي...الله ايه الحلاوة دي.....عمار يا ايجيبت
طبعا كنت بطيخة برضه وداخل فيها شمال وعامل فيها برم وصباح الغشومية يعني....بقيت كل ما اروح مكان الكاميرا معايا لحد ما اصحابي اقتنعوا ان الكاميرا لازقة ف ايدي او انا مولود بيها
بدأت انزل وأصور بيها المناطق اللي حواليا....منتزه ماشي ...بحر مبضرش .....جناين ع تماثيل ع اثارات بلدنا
والناس اتبسطت بيا ......قلت يمكن الناس شايفة حاجة انا مش شايفها
بعد فترة حوالي سنة ونص يعني من حوالي شهر قلت لازم اتعمل الشغلانة ع اصولها
تعمل ايه يا واد ...تاخد كورس تصوير..طيب فين وبكام وازاي
سألت وعرفت ان الاتيليه بيدي كورسات..قشدة جدا بكام يا عم الحاج...قشدة جداا...معاكم انا ف الليلة دي
وابتدي ابتدي ابتدي المشوار واه ياخوفي اه ياخوفي من اخر المشوار اه ياخوفي
عمو عبد الحليم
اول سؤال اتسألته انت عاوز تتعلم تصوير لييييييييييييييه؟ ....عه مين مات ليه وانا مالي انا عاوز اتعلم وخلاص هو التعليم من غير سبب قلة ادب ولا حاجة؟ عاوز اصور يا جودعان بحب التصوير حد له عندي حاجة.....بفلوسي يا عم الحج
والحمد لله عرفت بقي من الدكتور صبري الله يكرمه حاجات كتير عن العدسات والتصوير والكادر وخلافه
طبعا اخدت تريقة من كل اللي عرف اني باخد كورس تصوير...ياعم ما تشوف حاجة تنفعك...هتستفاد ايه يعني؟....الخ
بس ع مين انتو بتتكلموا مع عمو زلطة يعني فككوا مني خااااااالص وده برضه اللي كان بيحصل لما كنت بنزل اصور او بعمل حاجات غريبة غصب عني وانا بصور....الاقي مثلا شوية شباب يتريقوا عليا وانا بصور جرادة يقولولي هتستفاد ايه....ياعم الحاج انت مضايق نفسك ليه انا حررررررررررررررررر في بلد حررررررررررررررررررر عمار يا ايجيبت
المهم بعد الكورس بشهر بدأت ارجع ازاول العادة اللي فيا تاني...انزل اجوب الشوارع ...يعني ايه اجوب بالمناسبة؟...ومعايا طبعا حد من اصدقائي...خالد, علي , وليد ربنا يرجعه بالسلامة من الجيش, احمد حسن
المرة دي قلت اروح اصور المراكبية ف بحري بقي وكان معايا خالد صديقي
ولفينا واتبسطنا قوي ف طلعة تصوير لمدة 5 ساعات لفينا فيها بحري ع المراكبية كلهم والناس كانوا ودودين جدا وزي العسل وكلهم عندهم استعداد للتصوير مفيش مشاكل وبعد ما خلصنا بحري طلعنا ع بير مسعود بالمرة بقي
حكاية لوحدها ....طبعا غير ان المكان مليان صيادين فهو اساسا للحبيبة اجواز اجواز قطاقيط هربانين من المدارس وبيحبوا ع روحهم ع البحر ماعلينا مش قضيتنا
نوصل بقي للمهم كنت انا اتعلمت حاجة صغننة ف الفوتوشوب وطبقتها ع الصور وبعد كده جت الفنانة رحاب حلمي ربنا يكرمها وعلمتني شوية حاجات ف البرنامج يا حلاوة كورس خصوصي اونلاين ونفذت الحكاية دي ع كل الصور
وكالعادة حطيت الصور ع الفيس بوك
وياللهول....الصور عجبت الناس جدااااااااا الحمد لله
قوم اييييه جه كريم قالي عاوز اعملك بلوج شوف ازاي...كريم ده واحد صاحبي ع فكرة.....ازيك يا كريم انا بكتب ف البلوج اهو عشان ما تزعلش....قلت له وماله ياخويا ميضرش فكرة حلوة انا كان نفسي فيها من زمان بس مكنتش متخيل اني اعمل بلوج عشان التصوير
يا سلام ع الافكار...نحط صورة بعنوان معين من تأليفي طبعا ونشوف وجهة نظر الناس فيها وكل واحد وفلسفته ف الدنيا
والله جامد يا كيمو
وعملنا المدونة
ياللهول
طبعا كل صورة ممكن تقولنا الف حكاية
وزي ما كان دكتور عمرو الطويل بيقولنا
One Picture = 1000 Words
كتبت كل ده وانا مكنت عارف ابدأ
هي دايما كده البداية صعبة وبعد كده طالما انت حبيت الموضوع ربنا هيوفقك.....واخد لي بالك يابو حسن
كفاية كده ايدي وجعتني انهارده
سلامي
